കഴിയില്ലെനിക്ക്‌

ബോധമുദിച്ചു ബുദ്ധനാകാന്‍,
ക്രോധം വെടിഞ്ഞു ക്രിസ്തുവാകാന്‍,
ധാര്‍ഷ്ട്യം കളഞ്ഞു ഗാന്ധിയാകാന്‍,
മോക്ഷം തേടി ഭിക്ഷുവാകാന്‍.

പ്രണയത്തില്‍ മാംസച്ചുവ കലര്‍ന്നപ്പൊള്‍ തുടങ്ങിയതാണു ഓക്കാനം,
പെറ്റു വീണ ചാപിള്ളയെ കണ്ടു ഹൃദയം പൊട്ടി മരിച്ചതു,
 നിന്നോടു ബാക്കി വന്ന പ്രണയം

എവിടെയോ വെച്ചു നാം കണ്ടുമുട്ടും....

പകലുകളോടെനിക്കു പരിഭവമാണ്‌, അതിഴയും, പിന്നെ പിരിഞ്ഞു പോകും.
സന്ധ്യകളൊടെനിക്കു പ്രണയമാണ്‌,അതൊരു ഗസല്‍ പോലെ മനോഹരമാണ്‌.
ഇനിയും പകലും രാത്രിയും മാറി വരും..എവിടെയോ വെച്ചു നാം കണ്ടുമുട്ടും

എന്തിനാണു ?

എന്തിനാണു ഈറന്‍ മേഘങ്ങളെ നോക്കാതെ ഈ സന്ധ്യയില്‍ നീ തനിയെ വള്ളം തുഴഞ്ഞു പോയതു?

ഒന്നു തന്നെ ആയിരുന്നു..

നീ പാതി വഴിയില്‍ പിരിഞ്ഞതറിയാതെ കാത്തു നില്‍ക്കേ
ഞാന്‍ ഓര്‍ക്കാന്‍ ശ്രമിച്ചതും, നീ മറന്നു കളഞ്ഞതും ഒന്നു തന്നെ ആയിരുന്നു...

എന്റെ വേദനകളേയും വേവലാതികളേയും ഞാന്‍ ഹൃദയത്തില്‍ അടുക്കിവയ്ക്കും... അതൊരിക്കല്‍ കുന്നുകൂടും..അങ്ങനെ എന്റെ ഹൃദയഭിത്തികള്‍ വലിഞ്ഞു മുറികിക്കൊണ്ടേയിരിക്കും.ഒരിക്കല്‍ അതെന്നേയ്ക്കുമായി പൊട്ടിത്തെറിക്കും... ആ കുത്തൊഴുക്കില്‍ ഞാന്‍ ചിന്ന്ഭിന്നമായി ഒഴുകിപോകും...എന്റെ ശേഷിച്ച ഓരോ ഭാഗങ്ങളും എന്റെ സ്വപ്നങ്ങള്‍ വിളിച്ചുപറഞ്ഞുകൊണ്ടിരിക്കും....
അന്നു അവള്‍ കരയും... എന്നെയോര്‍ത്ത്‌ അവള്‍ പൊട്ടിപ്പൊട്ടിക്കരയും.. അവളുടെ കണ്ണുനീര്‍ ഒരു പുഴയായി, ആ കുത്തൊഴുക്കിനാക്കം കൂട്ടും. ഞാന്‍ അതിലൂടെ കൂടുതല്‍ അകലങ്ങളിലേയ്ക്കൊഴുകി പോകും. അന്നു അവള്‍ മനസ്സിലാക്കും ഞാന്‍ അവളില്‍ നിന്നെത്ര അകലെയായിരുന്നെന്ന്‌!

കാമം കഞ്ചാവാണ്‌
പ്രണയം പഞ്ചസാരയും

മഴ

മഴ, ഒരു പുഴ മുഴുവന്‍ എന്നില്‍ കോരിയൊഴിക്കുകയാണ്‌

മാറ്റം

അന്ന് അവളോടു പ്രണയം, ഇന്ന് പകയും,
ചുണ്ടില്‍ പുകയും, ചില്ലുഗ്ലാസ്സില്‍ പതയും.

എഴുതേണ്ടത്‌

കടല്‍ക്കരയില്‍ കഥ എഴുതി പഠിച്ചിരുന്നവനെ
കരളില്‍ കവിത എഴുതാമെന്നു പഠിപ്പിച്ചവള്‍
കരയും മനസ്സിനു കൂട്ടുവന്നവള്‍
നെഞ്ചില്‍ കൂടു കൂട്ടിയവള്‍
കവിളില്‍ ഉമ്മതന്നവള്‍...
അവള്‍ തനിച്ചാക്കി പോയപ്പോള്‍
എന്തെഴുതേണ്ടു ഇനി ഞാന്‍
കഥയോ കവിതയോ
പുതിയൊരു പ്രണയലേഖനമോ?

പ്രണയം

പ്രണയം സൗഹൃദത്തിന്‍ ജാരസന്തതിയാകുന്നു
അവളതിനെ ഗര്‍ഭഛിദ്രം ചെയ്തിരിക്കുന്നു
പിറക്കാതെ പോയ എന്റെ കുഞ്ഞിന്‍ പേരാണു പ്രണയം
അറപ്പോടെ അവള്‍ കൊന്നു കളഞ്ഞൊരു സ്നേഹത്തിന്‍ വേരാണു പ്രണയം

പ്രണയം/പ്രയാണം

സുമംഗലിയായി അവള്‍ മാഞ്ഞു പോയീടിലും
എന്റെ പ്രണയം മരിക്കുന്നില്ല
മംഗളം അവള്‍ക്കായി നേര്‍ന്നു ഞാന്‍
എന്‍(പ്രണയ)പ്രയാണം തുടരുന്നു